Sut caiff eich arian ei wario

Mae costau ein prosiectau yn cynnwys:  

• Costau staff y rheng flaen, gan gynnwys eu recriwtio a lles (hyfforddiant, costau, iechyd a diogelwch, a lles). Mae hyn yn cyfrif am 66% o’n holl gostau. 
• Y seilwaith i staff gyflawni eu rolau h.y. ffonau, cyfrifiaduron. 
• Costau prosiectau penodol megis llyfrau ar gyfer gwaith grŵp, costau lloches, a llogi ystafelloedd cwnsela. Mae rhentu llochesi gan gymdeithasau tai yn un o’n costau prosiect mwyaf. 
• Marchnata ar gyfer codi ymwybyddiaeth o wasanaethau, i sicrhau bod pawb sydd angen cymorth yn gwybod ein bod ni yma.  
• Monitro a gwerthuso, lle rydym yn sicrhau ein bod yn darparu gwasanaethau sy’n hygyrch ac o safon uchel.  
• Costau swyddfa. Rydym yn credu ei fod yn bwysig bod pobl sydd wedi profi unrhyw fath o drais yn erbyn menywod, cam-drin domestig, neu drais rhywiol yn gallu siarad â rhywun yn bersonol ac na ddylent orfod teithio’n bell i wneud hynny, a dyna pam mae gennym ganolfan bwrpasol ym mhob sir yr ydym yn gweithredu ynddi. 

Mae ein costau craidd yn cynnwys yr holl staff swyddfa gefn sydd eu hangen i redeg gwasanaethau.  Mae’r rhain yn cynnwys:  

• Cyllid  
• Adnoddau Dynol  
• Cyfleusterau (yn cwmpasu ein swyddfeydd a thai)  
• Llywodraethu   

Gyda’i gilydd maen nhw’n sicrhau ein bod yn cydymffurfio â Chyfraith Elusennau, Cyfraith Cwmnïau, a rheoliadau cyflogaeth, iechyd a diogelwch, a thai.  Maent yn sicrhau bod ein staff yn cael eu recriwtio, bod biliau’n cael eu talu, a chyfleoedd ar gyfer prosiectau newydd yn cael eu nodi.   

Mae ein tîm codi arian yn gyfrifol am gynnal incwm Cyfannol fel y gallwn barhau i ddarparu gwasanaethau.  Gwneir hyn drwy:  

• Godi arian yn y gymuned drwy ymgyrchu, noddi neu bartneriaethau corfforaethol.  
• Ymgeisio am gontractau sector cyhoeddus sy’n cynnwys gwasanaethau cymorth cymunedol a lloches.  
• Ymgeisio am grantiau o ymddiriedolaethau a sefydliadau fel Plant mewn Angen neu Gronfa Gymunedol y Loteri Genedlaethol.  
• Datblygu prosiectau newydd sy’n cynhyrchu eu hincwm eu hunain.  

Mae rhan fwyaf o’n hincwm yn dod o gontractau sector cyhoeddus a grantiau i ddarparu prosiectau penodol.  Er nad yw’n ffynhonnell incwm fawr, mae ein codi arian cymunedol yn hynod o bwysig gan ei fod yn ein galluogi i ariannu amrywiaeth o weithgareddau yr ydym yn cael anhawster i’w hariannu mewn mannau eraill, gan gynnwys cludiant i loches, bwyd i deuluoedd newydd sy’n cyrraedd, a gweithgareddau teuluol yn y gymuned.    

Mae ein Bwrdd Ymddiriedolwyr, sydd i gyd yn ddi-dâl, yn gosod ein cyflogau yn seiliedig ar feincnodi gydag elusennau a rolau tebyg.     

Rydyn ni’n ceisio blaenoriaethu cyflogau ein staff rheng flaen, ac rydym yn eu talu cymaint ag y gallwn o fewn ffiniau ein contractau llywodraeth.  Mae gweithiwr cymorth llawn amser sy’n gweithio gyda ni ar hyn o bryd yn ennill £2,500 y flwyddyn, sydd ar ben uchaf y cyflogau presennol o fewn y sector.  

Yn gyfreithiol, mae’n rhaid i ni adrodd i’r Comisiwn Elusennau yn flynyddol ar ein niferoedd staffio a’n cyflogau sydd i’w gweld yma. 

Mewn elusen, mae elw yn cael ei alw’n arian dros ben – incwm dros ben.  Pan fydd gennym arian dros ben, mae hyn yn mynd i mewn i’n cronfeydd, sef yr incwm a neilltuwyd ar gyfer pan fydd ein hincwm yn disgyn.  Rydym hefyd yn defnyddio’r arian dros ben hwn i ariannu prosiectau prawf, costau annisgwyl fel boeler newydd ar gyfer swyddfa, neu gostau yr ydym yn cael trafferth codi arian ar eu cyfer megis gwely a brecwast brys os na allwn gael teulu i loches ar unwaith.